ဒုတိယမြောက် သာမာန်တင်္ဂနွေနေ့

သံယောဟန် ၂း၁-၁၁ သူစေခိုင်းသမျှကိုပြုလုပ်ကြလော့။

ယနေ့ဖတ်ရှု့ရတဲ့ဧ၀ံဂေလိတရားတော်မှာ ကာနာမြို့လက်ထပ်ပွဲမှာ ယေဇူးခရစ်တော်ရဲ့ တန်ခိုးတော်ပြုလုပ်ကြောင်းကို ကြားနားဖတ်ရှု့ရမှာဖြစ်ပါတယ်။ ကာနာမြို့မှာပြုလုပ်သော ခရစ်တော်ရဲ့တန်ခိုးတော်ဟာ ကိုယ်တော်ရှင်၏ပထမဆုံးသော တန်ခိုးတော်ပြုလုပ်ခြင်းဖြစ်ကြောင်း သံယောဟန်က ရေးသားထားပါတယ်။ ဤကျမ်းပိုဒ်မှာ မှတ်သားစရာ နှစ်ချက်ရှိပါတယ်။-၎င်းတို့မှာ (၁) မိမိရဲ့အချိန်မရောက်သေးသော ယေဇူးခရစ်တော်ဟာ မယ်တော်မာရိယာရဲ့ကြားဝင်တောင်းခံပေးခြင်းကြောင့် တန်ခိုးတော်ပြုလုပ်ခြင်း နှင့် (၂) ယေဇူးခရစ်တော်ရဲ့ ငြင်းဆန်ဆန်စကားပြန်ခဲ့သော်လည်း မယ်တော်မာရိယာရဲ့ပြည့်ဝစုံလင်လှတဲ့ ယုံကြည်ခြင်းပါပဲ။ ပြောရမယ်ဆိုရင်တော့ ယုံကြည်ကြောင့် တန်ခိုးတော်ဖြစ်ပေါ်သလို၊ တန်ခိုးတော်ကြောင့် ယုံကြည်ခြင်းတိုးပွားကြောင်း သံယောဟန်က သက်သေခံထားတာဖြစ်ပါတယ်။

ထိုမှတ်သားဖွယ်ရာများနှင့်အတူ ယနေ့တရားတော်အား ကမ္မဌာန်းထောက်ရှု့စဉ်းစားကြည့်တဲ့အခါ မိမိတို့ရဲ့ယုံကြည်ခြင်းကော ဘယ်လိုမျိုးလဲ - ဘယ်လောက်ရှိသလဲ။-ဘ၀မှာကော ဘုရားနှင့်အတူ တရားနှင့်အတူ ရှိနေဖူးသလား။-ဒါမှမဟုတ် ဘုရားသခင်ဟာ မိမိတို့နှင့်အတူရှိနေတာကို သိရှိခံစားမိရဲ့လား။ တန်ခိုးတော်ဖြစ်ပေါ်ခြင်းရဲ့အရင်းမြစ်ဟာ ကိုယ်တော်သခင်ရှိနေခြင်းကြောင့်ပင် မဟုတ်လား။ ဒီတော့ ဒီလိုတန်ခိုးတော်ဖြစ်ပေါ်ခြင်းကို ကြုံတွေ့မြည်းစမ်းဖူးသလား။

ဘ၀ဟာ ဒုက္ခလို့တချို့ဆိုကောင်းဆိုပါလိမ့်မယ်။ သို့သော်လည်း သုခလည်းဟုတ်တာကိုတော့ မေ့မထားသင့်ပါဘူး။ ဒါကြောင့် လူသားမှန်သော်ဒုက္ခရှိလျှင်ပင် သုခနှင့်မကင်းပါဘူး။ သုခနှင့်ဒုက္ခကို ခိုင်းနှိုင်းပြီး ဘုရားသခင်ဟာ ကျွန်တော်တို့ဘ၀ရှိနေတယ် - မရှိဘူး စသဖြင့်တွက်ချက်မယ်ဆိုရင်တော့ ဒုက္ခဆိုတာ ဘုရားမရှိတဲ့အချိန်လေလား။ သတိရမိတယ် - ခရစ်တော်သခင် ဒုက္ခဝေဒနာခံစားချိန် သံလွင်ဥယာဉ်မှာ ဆုတောင်းစဉ် - အိုအဖ၊ အိုအဖ၊ ကိုယ်တော်ရှင်ဘယ်မှာလဲ - တပည့်တော်ကို စွန့်ပစ်ထားပြီလား။ အမှန်တကယ်တော့ ဘုရားသခင်ဟာ ကျွန်ုပ်တို့ဘ၀မှာ အမြဲအတူရှိနေပါတယ်။ သုခနှင့်အတူ ရှိနေပေးသလို၊ ဒုက္ခရောက်ချိန်မှာ ပို၍ရှိနေပေးပါတယ်။ ဘုရားသခင်ဟာ သနားကြင်နာတတ်ပြီး နှစ်သိမ့်တတ်ပါတယ်။ဒါကြောင့် ကျွန်တော်တို့ဘ၀မှာ ဘုရားသခင်ကို သုခရှိချိန်ချီးမွမ်းတေးဆိုနိုင်သလို ဒုက္ခတွေ့ချိန်မှာ အားကိုးရာဖြစ်ပါတယ်။ သုခဘုံပေါ်ရောက်ခိုက် ဘုရားသခင်ကို ချစ်ရတာ၊ ကောင်းကြီးသြဘာပေးရတာ သိပ်လွယ်သော်လည်း ဒုက္ခတွင်းထဲကနေ ဘုရားသခင်ကိုချစ်ရတာ၊ ကောင်းကြီးသြဘာပေးရတာတော့ မလွယ်ကူပါဘူး။ ဒါဟာ လက်တွေ့ဘ၀တစ်ခုပါ။ ဒါပေမယ့်လည်း ခရစ်ယာန်သူတောင်စင်များဟာ ဘုရားသခင်ကို ဒုက္ခတွင်းထဲကနေ ကောင်းကြီးသြဘာပေးနိုင်ပြီး ချစ်နိုင်သူတွေပင် ဖြစ်ပါတယ်။

မိတ်ဆွေ ဒီနေ့ကာနာမြို့လက်ထပ်ပွဲမှာ ခရစ်တော်(ဘုရား)ရှိနေပါတယ်။ ကာနာမြို့လက်ထပ်ပွဲဟာ ကျွန်တော်တို့တစ်ဦးချင်းစီရဲ့ဘ၀နဲ့တူပါတယ်။ ထို့အတူပဲ သုခနဲ့ပြည့်နေချိန်လို ပွဲမျိုးမှာ ခရစ်တော်ရှိနေသလို ဒုက္ခကြုံလာချိန်မှာလည်း ကိုယ်တော်ဘုရားရှိနေပါတယ်။ ဒါကိုသိပြီး အပြည့်အ၀ယုံကြည်နေဖို့ လိုပါတယ်။ ကျွန်တော်တို့ကို ကူညီပေးဖို့ အမြဲအသင့်ရှိနေပြီး အချိန်မတန်သေးဘူးဟု ပြောဆိုနေလျှင်ပင် ကူညီနေဆဲပါ။ အမှန်တကယ်လိုအပ်နေချိန်၊ မယ်တော်သခင်ရဲ့ ကြားဝင်ဆုတောင်းပေးခြင်းတွေကြောင့် ဘယ်တော့မှ မငြင်းရက်နိုင်သူဟာ ဘုရားသခင်ပင်ဖြစ်ပါတယ်။ - ဒါကြောင့် "သူပြောဆိုသည့်အတိုင်း ပြုလုပ်ကြပါ။" မယ်တော်မာရိယာရဲ့ တိုက်တွန်းစကားပါ။ ကျွန်တော်တို့ယုံကြည်ခြင်းကို မေးမြန်းလိုက်ခြင်းပင်ဖြစ်ပါတယ်။ ယုံကြည်ခြင်းအပြည့်ဖြင့်ချည်းကပ်တဲ့အခါ အရင်ကထက်ပိုကောင်းတဲ့ စပျစ်ရည်လို ပိုပြီးတန်ဖိုးရှိတဲ့ဘ၀ကို ပိုင်ဆိုင်နိုင်ပါလိမ့်မယ်။

ဒိုမီနီကန်ကိုရင်

#Dominicankoyin